Ginpasigurado sang Iloilo Traffic Management Unit (ICTMU) nga 100% ang ila pagpanghanda para sa dalagan sang trapiko subong nga malawig ang holidays ilabi na sa nabilin nga inadlaw sang 2024.
Sa interview sang Bombo Radyo kay Uldarico Garbanzos, Head sang Iloilo Traffic Management Unit, iya ginpahayag nga ang convergence sang mga salakyan sa Iloilo City subong nga holidays ang nagataas bangud man sa may mga nagapauli sa ila tagsa ka mga probinsya.
Suno kay Garbanzos, na-identify na sang ila talatapan ang mga areas nga mahimo magpugok kon sa diin, may augmentation naman sang mga traffic enforcers.
Ginpahayag man sini nga tuyo sang tikang nga mapabilin nga matalunsay ang trapiko sa tagsa ka dalan sang syudad isa ka adlaw antes magtakop ang 2024.
Nagpanugyan man ini sa publiko ilabi na sa mga motorista nga mangin mahinalongon sa dalan kag magsunod sa mga traffic rules agud malikawan ang vehicular accidents.
Ginalauman naman ang moderate traffic buwas nga adlaw sa palibot sang Plaza Libertad sugod alas-6:00 buwas sang aga bangud man sa pagkomemorar sang 128th Death Anniversary ni Dr. Jose Rizal.
