ILOILO – Nagapakita sa data sang Department of Health Western Visayas Center for Health Development nga boga ang mayor nga rason sang injuries nga naangkon sang mga biktima samtang nagahilapit ang pagsug-alaw sang Bag-ong Tuig.
Sa interview sang Bombo Radyo kay Dr. Fritzi Ann Suzette Jeroso-Dequito, Head sang Health Promotion Unit sang DOH Region 6, iya ginpahayag nga humalin sang Disyembre 21, 2024 tubtob subong, nakarekord na ang ahensya sang 41 ka mga kaso sang firework-related injuries sa Western Visayas.
Ini ang mas mataas kun ipaangid sa 37 nga narekord sang ahensya sang tinalikdan nga tuig 2023 sa kapareho nga period.
Suno kay Dr. Dequito, 18 ka mga biktima ang mga nahalitan sang boga subong sa diin nakaangkon ang mga ini sang blast ukon burn injury nga wala sang amputation kag eye injury.
Pahayag niya, masobra 70% sa mga biktima amo ang naga-edad isa tubtob 10 ka tuig.
Panugyan sang natungdan, kadam-an sa mga nakaangkon sang injuries bangud sa pagpalupok amo ang mga kabataan gani kinahanglan nga indi gid ang mga ini pagpabay-an sang ila ginikanan kag paandaman sa halit nga matuga sang firecrackers ilabi na sang ginadumilian nga boga.
Mas maayo dugang ni Dr. Dequito nga maggamit sang alternatibo sa paghimo sang matunog nga gahod kaangay sang torotot, kaldero kag pagpatukar sang musika agud mangin masadya kag hilway ang pagselebrar sang New Year sa balay kag indi sa ospital.
