𝗜𝗟𝗢𝗜𝗟𝗢 𝗖𝗜𝗧𝗬 – All set na ang Iloilo City Government sa patigayunon sa Grand 2025 New Year’s Countdown.
Ini ang patigayunon sa Iloilo Freedom Grandstand.
Sa interview sang Bombo Radyo kay Joy Fantilaga, spokesperson ni Iloilo City Mayor Jerry Treñas, iya ginpahayag nga maga-umpisa ang aktibidad las 10:00 karon sa gab-i kag magalawig tubtob las 2:00 bwas sa kaagahon, Enero 1, 2025.
Suno kay Fantilaga, may yara sang banda nga magatukar kag balantayan man ang Fireworks Display.
Masobra naman sa 300 ka mga personnel halin sa nagkalain-lain nga mga ahensya ang ipang-deploy agud masigurado ang seguridad sa kahiwatan.
Maga-deploy man ang Iloilo City Police Office (ICPO) sang masobra 100 ka mga personnel halin sa nagakalain-lain nga units.
Dugang pa, masobra naman sa 50 ka mga multipliers lakip na ang mga barangay tanods ang magabulig sa ICPO.
Mapahamtang man ang Transportation Traffic Management Office (TTMO) sang masobra 50 ka mga personnel lakip na ang traffic enforcers, support staff, kag myembro sang Emergency Communication Team (ECT) agud mapasigurado ang matalunsay nga dalagan sang trapiko.
Magabantay man ang City Disaster Risk Reduction and Management Office (CDRRMO) sa mga strategic areas para sa health-related emergencies.
Naka-standby naman ang Bureau of Fire Protection (BFP) kag fire brigade volunteers sa tion nga may yara sang magluntad nga fire-related incidents kag iban pa nga emerhensya.
Samtang, maga-deploy man ang Philippine Coast Guard (PCG) sang ila patrol vessels agud magbantay sa maritime activities sa tion sang selebrasyon.
