Nagpanugyan ang Iloilo Provincial Health Office sa mga ginikanan nga indi pagpahanugutan ang mga kabataan nga magpalupok bangud posible nga ospital ang ila dangtan.
Ini kasunod sang nagataas nga numero sang firecracker-related injury cases sa Iloilo sa diin lunsay mga kabataan naga edad isa tubtob 10 ka tuig ang biktima.
Sa latest data sang PHO, 23 ang mga biktima sang palupok sa diin 14 diri ang naga-edad 1-10 years old, anum ang naga edad 11-20 years old, duha ang naga edad 21-30 years old kag isa ka kaso ang naga-edad 41 anyos pasaka.
Sa interview sang Bombo Radyo kay Dr. Rodney Labis, Chief sang Health Service Delivery Division sang Iloilo Provincial Health Office, iya ginpahayag nga lima ka tuig nga lalaki ang pinakabata nga biktima sang palupok.
Suno kay Labis, mas maayo nga maglantaw na lang ang pamilya sang community fireworks display ukon maggamit sang torotot, kaldero kag busina sang motor ukon salakyan sa pagsug-alaw karon sang bag-ong tuig.
Pahayag niya, tuman pa gid ka delikado magpinalupok kun yara sa impluwensya sang makahulubog nga ilimnon ang indibidwal.
Nagpangabay si Dr. Labis sa mga barangay officials nga subong nga adlaw ang nagakadapat nga mas huot ang kampanya kontra sa pagpalupok.
