LAMBUNAO, ILOILO – Nakapalagyo ang suspek nga naglabo-patay sa iya man lang himata upod sa inom sa Barangay Bagongbong, Lambunao, Iloilo.
Ang biktima amo si alyas Jeofrey, 27 anyos, may live-in partner kag residente sang nasambit nga barangay.
Samtang ang suspek naman amo si alyas Ron-Ron, single kag residente sang Valderrama, Antique.
Sa interview sang Bombo Radyo kay PMaj. Roy Tayona, Hepe sang Lambunao Municipal Police Station, iya ginpahayag nga ginbitbit palagyo sang suspek ang binangon nga iya gingamit sa pagpatay sa biktima.
Sa pagkamatuod suno kay Tayona, paryentehanay man lang ang duha.
Pahayag niya, naga-inom inom ang biktima kag suspek upod ang ila mga barkada sang Enero 1 sang nagbaisay ang duha bangud yara na sa impluwensya sang makahulubog nga ilimnon.
Gilayon nagkuha sang binangon si Ron-Ron sa balay ni Jeofrey kag ginlabo ang biktima rason sang iya kamatayon.
Dugang sang natungdan, ginapreparar na sang Lambunao PNP ang pagpasaka sang kaso nga murder batuk sa suspek.
