Ipaidalom sa ballistic examination ang bala nga nagtalang kag nag-igo sa atop sang isa ka balay sa Barangay Tarug, Alimodian, Iloilo.
Ang amo nga balay ang ginapanag-iyahan ni Francisco Guardia, residente sang nasambit nga lugar.
Sa interview sang Bombo Radyo kay Police Lt. Rolly Sorongon, Deputy Cop sang Alimodian Municipal Police Station, iya ginpahayag nga nag-request na sila sang ballistic examination sa Regional Forensic Unit agud matumod kon ano nga sahi sang pusil ang gingamit sa insidente.
Suno kay Sorongon, sang nabaton nila ang impormasyon, insigida nga nagpadulong sila sa balay ni Guardia kag didto nakumpirma nga may yara sang stray bullet.
Ginpahayag man sini nga nagpatuman sila sang ocular inspection kag imbestigasyon kon sa diin, naguwa nga sa atop nag-agi ang bala kag nakit-an ini sa salog sang sala sang balay.
Maswerte naman nga wala sang may naigo nga indibidwal sa nagtalang nga bala.
Ini naman ang labing-una nga tion nga may natabo nga insidente sa lugar.
