Naghatag na sang direktiba ang Iloilo City Police Office (ICPO) sa hepe sang Iloilo City Police Station 3 nga paga-imbestigaran ang reklamo nga pagpang-harass sang isa ka residente sa Brgy. M.V. Hechanova, Jaro, Iloilo City.
Sa interview sang Bombo Radyo kay PMAJ. Shella Mae Sangrines, spokesperson sang Iloilo City Police Office, iya ginpahayag nga usisaon sang talatapan ang status ukon dalagan sang imbestigasyon ilabi na ang nangin responde sang kapulisan.
Suno kay Sangrines, lantawon ang mga rason sa likod sang nangin responde agud matumod kon may lapses sa bahin sang kapulisan.
Ginpasalig man sini nga kon matukiban nga may kapaslawan ang kapulisan, indi magduha-duha ang talatapan nga sila ang disiplinahon.
Nagpasalamat man ang natungdan sa bahin sang pamilya ni Engineer Brian Semeniego sa pagpalab-ot sang concern bangud mangin pamaagi ini sa pagtsekyar sang tagsa ka pagresponde sang mga pulis.
