Naglab-ot na sa 35 ka mga kaso sang firecracker-related injuries ang nabalhag sang Iloilo Provincial Health Office (IPHO).
Ini ang na-record sugod sang Disyembre 21, 2024 tubtob Enero 2, 2025.
Sa interview sang Bombo Radyo kay Dr. Rodney Labis, Chief sang Health Service Division sang Iloilo Provincial Health Office, iya ginpahayag nga apat ang nagdugang nga mga kaso, kon sa diin, sa kabug-usan kalabanan diri ang bangud sa paggamit sang boga ukon improvised cannon.
Suno kay Labis, halos sa mga nabiktima ang naga-edad isa tubtob pulo ka tuig nga nagabutang sa 48.5% sang kabug-usan nga firecracker related injuries.
Kalabanan naman sa mga pilas nga naangkon sang mga biktima amo ang eye injury nga yara sa 20 ka kaso, ginasundan sang burn injury ‘with no amputation’ nga may 13 ka kaso, duha naman sa burn injury ‘with amputation’ sa banwa sang San Enrique kag Cabatuan.
Yari naman ang listahan sang mga banwa nga nabalhag nga may firecrackers cases:
- Miagao – 6
- City of Passi – 5
- Ajuy – 3
- Dumangas – 3
- Oton – 3
- Cabatuan – 2
- San Enrique – 2
- Santa Barbara – 2
- Anilao – 1
- Banate – 1
- Barotac Nuevo – 1
- Barotac Viejo – 1
- Concepcion – 1
- Lambunao – 1
- San Joaquin – 1
- San Miguel – 1
- Sara – 1
Nagapati man ang natungdan nga labing-importante sa gihapon ang mga tikang nga ipatuman sang law enforcement agencies agud nga malikawan ang amo nga insidente.
