Ginpanginwala sang Department of Health (DOH) ang mga report sang ginaalegar nga “international health concern” nga nagalibot sa social media.
Suno sa Department of Health, sa karon wala sang nagasuporta sa nagalapta nga mga post sa social media nahanungod sa ginaalegar nga international health concern.
Gin-isyu sang DOH ang pahayag sa tunga sang mga paglapta sa social media nahanungod sa bag-o nga epidemya nga gina-alegar naga-overwhelm sa mga ospital kag crematory sa China nga naga-involve sang influenza A, HMPV, mycoplasma pneumoniae, kag COVID-19.
Ginpanginwala man sang Chinese Embassy sa Pilipinas ang mga post sa social media kag gintawag ini nga “fake news”.
Ginhatagan pagtamod sang DOH nga ang Pilipinas isa ka aktibo nga miyembro sang World Health Organization network nga nagasunod sa International Health Regulations (IHR). Ini nga sistema nagahatag sang mga update sa mga concern sa ikaayong lawas.
Ang mga disease surveillance systems sang Pilipinas nagapadayon nga naga-function kon sa diin, aktibo nga gina-verify sang DOH ang tanan nga impormasyon, kag padayon nga gina-update ang publiko.
Nagapanugyan man ang ahensya indi pag-i-share ang mga kwestyonable nga website ukon mga ginhalinan sa online.
