Nagsabat na ang lalaki nga ginpa-Bombo sang pamilya Semeniego sa Barangay M.V. Hechanova, Jaro, Iloilo City.
Ini kasunod man sang ginpa-Bombo ini bangud sa pagpanghampak sang kabilya sa gate sang pamilya Semeniego.
Sa interview sang Bombo Radyo kay Mervin Roscales, ang ginareklamo, iya ginpahayag nga sang Disyembre 25 didto na sila nagsugod tulog sa ila balay sa nasambit nga lugar.
Suno kay Roscales, pasado las-8 sa gab-i sa amo nga adlaw, tuman ka linong ang ila palibot kag sang hinali lang siya nga nakibot bangud sa pagpamulpog nga nabatian halin sa puluy-an nanday Semeniego.
Ginlaragway man sini nga ang dingding nga nagabal-ot lamang sa ila tunga amo ang gate nanday Semeniego.
Rason man nga naguwa sila sa ila puluy-an kaupod ang iya asawa kag makapalagyo sa magalong nga pagpamulpog.
Mga las-10 sang gab-i sang nagdesisyon sila nga magbalik sa paluy-an, kon sa diin nalabayan sini nga may mga naga-caroling.
Tubtob naglab-ot sa pasado las-10 na sang may nagakanta sa gihapon nga nagatuga sa ila sang huol.
Rason man nga nagpadulong ini sa balay ni Semeniego kag nagpamangkot kon ano ang okasyon, apang maisog nga nagsabat si Engr. Semeniego sa iya bangud man sa nakainom.
Suno kay Roscales, ginkuhaan siya sang binangon ni Semeniego kag didto na nagluntad ang komosyon sa ila duha.
Una na nga ginbuyagyag sang punong barangay sang nasambit nga lugar nga masami wala naga-intindihanay ang duha ka pamilya kag makapila na ka beses nga nagpa-blotter.
Nahibaluan nga gintumod man sang kapitan nga ang ulihi nga away sang duha ka pamilya ang bangud sa nagalapaw nga “tarog” sang atop sang pamilya Semeniego.
Ang hitabo ang gina-imbestigaran naman subong sang Iloilo City Police Station 3 kasunod sang ginapahayag kakulangan sang mga pulis sa pagresponde sa insidente.
