Nakita nga naka-park sa kilid sang ancestral house sa Moroboro, Dingle, Iloilo ang ginapahayag salakyan nga gingamit sa pagpang-hold up sang mga suspek sa Pilar, Capiz.
Sa interview sang Bombo Radyo kay PCapt. Alwin Salmon, Officer-In-Charge sang Dingle Municipal Police Station (MPS), iya ginpahayag nga ginapanag-iyahan sang isa ka Overseas Filipino Worker (OFW) ang amo nga salakyan nga Mitsubishi Mirage.
Dugang pa ni Salmon, nagpadulong sa Dumarao, Capiz ang asawa sang OFW sang Sabado nga adlaw dala ang salakyan agud magbisita sa iya himata.
Didto kag ginhulam ini sang iya nga brother-in-law sang Domingo sang aga kag ginbalik man sang hapon.
Nakabalik naman ang asawa sang OFW sa banwa sang Dingle sang hapon sang amo man nga adlaw.
Kon balikan, ginharangan kag ginpauntat ang mga biktima sang robbery sang tatlo ka mga wala makilan-an nga kalalakihan nga nakasuksok sang Police Athletic Uniform kag ini sila ang gintutukan sang caliber .45 pistol nga armas-luthang.
Ginapahayag nga madasig nga nagsulod ang tatlo ka mga suspek sa amo nga salakyan kag pwersa nga gintaban mas ukon menus P1 milyon nga balor sang kwarta, cellphones, yabi sang salakyan, kag iban pa.
