Patay ang driver kag backrider sang motorsiklo matapos makabunggo sa truck sa coastal road sang Brgy. Bigke, Leganes, Iloilo.
Ang driver amo si Alyas Miraluna, 48, residente sang Brgy. Baldoza, Lapaz, Iloilo City, kag ang backrider amo si Alyas Jomel, 27, kag residente sang Gua-an, Leganes.
Ang driver naman sang truck amo si Alyas JR, 38, kag residente sang Leon.
Sa interview sang Bombo Radyo kay Police Senior Master Sergeant Willy Aquidado, chief investigator sang Leganes Municipal Police Station, iya ginpahayag nga halin ang mga biktima sa banwa sang Leganes kag papauli na kuntani sa syudad sang Iloilo sang nabungguan nila ang nalikod nga bahin sang truck nga may karga nga backhoe nga masulod na kuntani sa warehouse.
Nakaagum ang mga ini sang daku nga pilas sa ulo kag kag nagkalain-lain nga parte sang lawas.
Gilayon nga gindala ang driver sa Western Visayas Medical Center samtang ang angkas naman gindala sa Metro Iloilo Hospital and Medical Center apang lunsay gindeklarar nga dead on arrival.
Suno sa imbestigasyon sang Leganes MPS, madasig ang pagpadalagan sang driver sang motorsiklo kag posible wala matalupangdan ang truck.
Base sa inisyal nga istoryahanay sang pamilya sang mga sakay sang motorsiklo kag driver sang truck, posible nga ma-aregluhanay ang mga ini.#
(Article: Bombo Phauline Pillora)
