Natumod sang Iloilo Police Provincial Office (IPPO) nga ang isa sa anom ka mga suspek sa pagpang-hold up sa Pilar, Capiz ang isa ka pulis.
Ini amo si Police Officer 1 Lyman John Ochenta, residente sang Pavia, Iloilo.
Sa anum sa mga suspek, duha diri ang nadakpan nga amo sanday John Francis Morines Daquilaña kag Jemary Daquelaña lunsay residente sang Barangay Gibato, Dumarao, Capiz.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga na-dismissed sa serbisyo si Ochenta sang 2017.
Suno kay Araño, may sampaw-sampaw nga kaso nga ginapangatubang ang suspek lakip na diri ang Qualified Piracy bangud sa ginhimo sini sa Carles, Iloilo.
Lakip man ang anay pulis sa robbery incident sa Sara, Iloilo kon sa diin gintudlo ang suspek sa pag-hold up sa supervisor sang J&T Express kag pagtaban sang masobra P1 million.
Ginbuyagyag man sang natungdan nga nakaupod man si Ochenta pagpanghold-up sa isa ka soft drinks company sa Pilar, Capiz, kon sa diin ginabanta malapit P5 milyones ang ila nataban.
Sa subong indi pa matumod ni Araño ang rason sang pagka-dismissed ni Ochenta sa serbisyo apang suno sa iya, nakasuhan ini sang grave misconduct bangud sa iya performance sa duty.
