Nagpalab-ot sang ila pagpakig-unong ang pila ka mga Filipino nga atleta kasunod sang kamatayon sang SEA Games gold medalist nga si Mervin Guarte matapos ini ginbuno sa Calapan City, Oriental Mindoro.
Isa sa naghatag sang iya tribute amo si EJ Obiena kun sa diin suno sa pole vault champion, isa ka trahedya ang natabo sa iya ginakabig nga kuya.
Madumduman nga sanday Obiena kag Guarte ang pareho nga naghakot sang medalya sa track and field sa diin si EJ ang nakatipon sang tatlo ka gold medals kag isa ka silver sa SEA Games samtang si Guarte naman ang may duha ka silver sa men’s 800m kag 1500m events sa 2011 edition sa Jakarta, Indonesia.
Sunod nga nagsaylo si Guarte sa obstacle course racing, kun sa diin nagdaug ini sang pila ka gold medals.
Sang 2019, nangibabaw ini sa men’s 5km sang obstacle course racing antes siya kag tatlo ka iban pa ang nagkuha sang gold sa men’s team relay sa Cambodia SEA Games sang nagligad nga tuig.
Isa man sa nagpalab-ot sang pagpakig-unong amo ang marathon runner nga si Mary Joy Tabal nga nagpasalamat man kay Guarte sa pagtiglawas sang Pilipinas kag pagaserbe nga inspirasyon sa iban nga mga atleta nga Pinoy.
Matandaan nga si Guarte ang nagakatulog sa balay sang isa ka barangay official sang natabo ang pagbuno sa iya kahapon.
Gindala pa ini sa ospital apang ginbawian gid sang kabuhi.
Ginapangita pa tubtob subong ang tawo nga nagbuno-patay sa atleta.
