Nagapabilin sa gihapon nga at-large ang dismissed police nga isa sa pito ka mga suspek nga sa likod sang robbery sa mga distributors sang isa ka beverage company sa Barangay Sta. Fe, Pilar, Capiz.
Ini amo si Police Officer 1 Lyman John Cabrera Ochenta sang Barangay Pal-agon, Pavia, Iloilo.
Si Ochenta ang ulihi nga na-assign sa Sara Municipal Police Station.
Sa nasambit nga robbery incident, nakuha ang ₱3.1 million, cellphones kag liyabe sang salakyan sang tatlo ka mga biktima.
Naghalin ang mga ini sa Balasan, Iloilo kag sang yara na ang mga ini sa Pilar, Capiz, ginparahan sila sang mga suspek nga nagpakuno-kuno nga pulis sa diin ginpahayag sang mga ini nga may nabaton sila nga impormasyon nga may mga druga ukon kontrabando nga dala ang mga biktima.
Narekober naman sa Moroboro, Dingle, Iloilo ang salakyan nga gingamit sang mga suspek bilang getaway vehicle.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office (IPPO), iya ginpahayag nga ginkilala mismo si Ochenta sang mga witness kag biktima.
Ginpahalin ini sa serbisyo sang Setyembre 4, 2017 bangud sa kaso nga Grave Irregularities in the Performance of Duties.
Naulamid man ini sa hold-up incident sa J&T Logistics sa Sara, Iloilo kag pagpatay sa isa ka chief security sang sakayang pandagat sa Sicogon Island sa Carles, Iloilo sang Setyembre 10, 2022.
Samtang, ginkumpirma naman ni Capiz Police Provincial Office (CPPO) Director Police Colonel Albert Tapulao nga napasakaan na sang kaso nga robbery sa Capiz Provincial Prosecutor’s Office si Ochenta kag iban pa gid nga mga suspek nga kaupod sini.
Ini amo sanday Marnie John Asajar sang Barangay Dominggo, Sara, Iloilo nga nagpakuno-kuno nga pulis kag nagapabilin man nga at-large, John Daquilaña nga nadakpan sang Enero 6, Gemmarie Daquilaña – tiya ni John kag nadakpan man sang Enero 6, Leonito Tajasco kag Arnel Arguilles.
Sa subong, ginahibalo pa sang kapulisan ang identity sang isa pa ka suspek sa robbery incident.
