Ginpangunahan ni Manila Archbishop Jose Cardinal Advincula ang Misa Mayor sa Quirino Grandstand sa Manila nga gintambungan sang masobra sa 140,000 ka mga deboto ni Hesus Nazareno.
Nag-umpisa ini kaina sang tungang-gab-i kag ginsundan sang Panalangin sa Bukang-liwayway (Prayer at Dawn) kag ang magasunod amo na ang Translacion.
Sa iya homily sa misa, gin-engganyo ni Cardinal Advicula ang mga Pilipino nga deboto nga sundon ang mga ginatudlo ni Hesus. Magaresulta lamang sa kapaslawan suno sa iya ang pagpa-impluwensya sa kuwarta, bisyo, kag iban pa nga kahimuan sang kalautan.
“Siya (Jesus Nazareno) ang sundin natin. Ang mga utos niya ang isabuhay natin. Ang mga aral niya ang isa puso natin. Ang halimbawa niya ang tularan. Mas mabuti ang pagsunod sa mahal na Senior (Jesus Nazareno),” pahayag sini sa atubang sang mga deboto. “Pag-asa kay Hesus at pagsunod kay Hesus; ito ang mga tanda ng tunay na deboto. Ipangako natin ito kay Hesus, siya lamang ang maaasahan natin, siya ang laging nating sundin.”
“Nabubuhay siya sa mga puso natin, nabubuhay siya sa paligid natin, nabubuhay siya kasama natin. Huwag na tayong magpapatay-patay. Habang may pagasa, may buhay kaya’t mabuhay tayo sa pagasa kay Hesus,” dugang pa sang cardinal.
Ang tema sang kapistahan subong nga 2025 amo ang “Mas Mabuti ang Pagsunod kaysa Paghahandog sa mga Umaasa kay Jesus”.
Ang Feast of the Black Nazarene 2025 amo ang una nga selebrasyon sa Manila halin sang gindeklarar ini nga “national feast” ukon isa ka kapistahan nga dapat i-obserbar sang tanan nga dioceses sa pungsod.
Kahapon sang aga, matandaan nga masobra 22,000 ka mga deboto ang nagkadto sa Quirino Grandstand para sa “pahalik” ukon “pagpupugay” para sa Jesus Nazareno.
Ginaselebar ang Translacion sa kada Enero 9 nga amo ang naga-komemorar sang pagsaylo ang imahe sang Jesus Nazarene halin sa San Nicolas de Tolentino Church sa Intramuros pakadto sa Quiapo Church sang 1700s.
Sang 2024, masobra 6.5 million devotees ang nagpasakop sa Translacion nga amo ang una nga pagbalik matapos tatlo ka tuig nga ginpaiway bangud sa COVID-19 pandemic.
