Gin-athag sang Police Regional Office 6 nga indi kabahin sang isa ka organisado nga grupo ang mga suspek sa likod sang robbery sa mga distributors sang isa ka beverage company sa Barangay Sta. Fe, Pilar, Capiz.
Sa interview sang Bombo Radyo kay PLtCol Arnel Solis, spokesperson sang Police Regional Office 6, iya ginpahayag nga mga magkakilala lamang ang mga suspek kag nag-istoryahanay nga magpatigayon sang nasambit nga robbery.
Sa amo nga robbery, nakuha ang ₱3.1 million, cellphones kag liyabe sang salakyan sang tatlo ka mga biktima.
Naghalin ang mga biktima sa Balasan, Iloilo kag sang yara na ang mga ini sa Pilar, Capiz, ginparahan sila sang mga suspek nga nagpakuno-kuno nga pulis sa diin ginpahayag sang mga ini nga may nabaton sila nga impormasyon nga may mga druga ukon kontrabando nga dala ang mga biktima.
Narekober naman sa Moroboro, Dingle, Iloilo ang salakyan nga gingamit sang mga suspek bilang getaway vehicle.
Sa pito ka mga suspek, duha na ang nadakpan nga amo sanday John Daquilaña kag tiya nga si Gemmarie Daquilaña nga ginatudlo nag-drive sang getaway vehicle sang mga suspek.
Isa man sa mga suspek nga nagapabilin nga at-large amo si dismissed Police Officer 1 Lyman John Cabrera Ochenta sang Barangay Pal-agon, Pavia, Iloilo.
Samtang, wala naman ginadula sang kapulisan nga posible nga gamiton sang politiko ang grupo sang mga suspek rason nga mangin hugot gid ang pagbantay sa ila sang Police Regional Office 6.
