Masobra sa walo ka milyon nga mga Pilipino nga Katoliko nga deboto ni Hesus Nazareno ang nag-upod sa Traslacion subong nga 2025.
Santo sa report sang National Disaster Risk Reduction and Management Council (NDRRMC) pasado ala una kaina sang kaagahon, yara sa 8,093,850 ang nag-upod sa prusisyon samtang nga ginadala ang milagroso nga imahe ni Hesus Nazareno halin sa Quirino Grandstand pakadto sa Quiapo church.
Ginbase ini sa tatlo ka mga lugar nga gin-monitor sang otoridad nga amo ang Quirino (1,264,790), Quiapo (6,442,050), kag ang mismo nga prusisyon (387,010).
Ini nga tuigan nga prusisyon isa man sa pinakamalawig nga nagdugay sang 20 ka oras, 45 minutos, kag apat ka segundos suno sa mga opisyal sang simbahan sa Quiapo.
4:41 sang Huwebes sang kaagahon sang nagsugod ang Traslacion kag nagtapos sang 1:26 na kaina sang kaagahon, Biyernes.
Nalampasan sini ang kadamuon sang naglinigad nga mga tinuig. Sang Enero 2017, madumduman nga masobra 1.4-million ka mga deboto ang nagkadto kag naglawig ini sang masobra 22 oras kag 19 minutos.
Ang Traslacion amo ang re-enactment sang pagsaylo sang imahe halin sa Intramuros pakadto sa Quiapo Church sang 1787.
