Ginalantaw sang Pavia Municipal Police Station ang duha ka mga anggulo sa pagtiro-patay sa pastor sa Barangay Anilao, Pavia, Iloilo.
Ang biktima amo si Douglas Jover, 63-anyos kag residente sang Brgy. Quintin Salas, Jaro, Iloilo City.
Sa interview sang Bombo Radyo kay PLt. Gabriel Manguera, Deputy Chief of Police sang Pavia MPS, iya ginpahayag nga una nga anggulo amo bangud sa mga kaso sa barangay nga indi pag-intindihanay sang biktima kag sang iya asawa, possible nga may third party.
Suno kay Manguera, ika-duha amo ang mga utang sa negosyo nga nagresulta man sa indi pag-intindihanay.
Tatlo naman ka mga persona ang ginalantaw nga person of interest sang otoridad nga nagplano kag naghimo sang krimen.
Nagpasalig man ang natungdan nga sa kabug-usan nga 100%, yara na sa 60% ang dalagan sang kaso.
Nahibaluan nga nag-agum ang biktima sang igo sang bala ang halin sa ulo kag naglapos sa sag-ang sini nga gintunaan man sang iya kamatayon.
