Suspendido ang face-to-face classes sa tanan nga lebel sa Iloilo City subong nga adlaw, Enero 13, kadungan sang pagpatigayon sang Iglesia Ni Cristo sang National Rally for Peace.
Suno kay Mayor Jerry Treñas, ini nga desisyon ang kasunod sang coordination meeting sang concerned offices sa mga organizers sang peace rally.
Bangud sa kadamuon sang attendees kag agud mangin matalunsay ang operasyon, ginpakamaayo suno kay Treñas nga ipa-iway anay ang face to face nga klase apang ginapanugyanan ang mga eskwelahan kag unibersidad nga magsaylo sa modular learning.
Sa bahin sang mga operasyon sang mga opisina sang Iloilo City Government, gin-athag nga magapadayon sila subong nga adlaw.
Base pa sa Executive Order (EO) No. 005-A, gina-engganyo man sang alkalde ang heads of offices kag operations sang national government agencies and offices kag private companies and offices nga mag-operate anay sa skeletal force.
Ginalauman naman nga 30,000 ka mga miyembro ni INC halin sa Panay ang magatipon sa Iloilo Freedom Grandstand diri sa City Proper umpisa 6:00 subong nga aga tubtub alas sais karon sa gab-i.
Lakip sa magatambong amo ang 4,000 halin sa Antique kag northern Iloilo, tag-5,000 halin sa Aklan kag Capiz kag 12,000 halin sa southern Iloilo.
Kahapon kag kagab-i, madamo na ang nag-abot sa syudad agud mag-set up sang venue para sa bilog nga adlaw nga mga aktibidad subong nga Lunes. Ang iban naman ang nagpaligad na sang gab-i sa hotels para mas temprano sila nga makaabot sa venue subong nga aga.
Sa interview sang Bombo Radyo kay Minister Troy Calimpong sang Christian Family Organization sang INC Iloilo District, iya ginpahayag nga may yara sang entertainment kaangay sang pagkanta kag lantawon man nila ang peace rally sang iban nila nga kaupdanan sa iban nga sites sa Pilipinas.
Ginpahayag sini nga nagsunod sila sa tanan nga proseso kaangay sang pag-secure sang permit.
Ginpaathag man sini nga ang tuyo sang “National Rally for Peace” amo nga suportahan ang pahayag ni President Ferdinand Marcos, Jr. nga indi na lang mag-file sang impeachment complaints batok kay Vice President Sara Duterte.
Matandaan nga ginsuportahan sang INC ang UNITEAM ukon tandem nanday Marcos kag Duterte sang 2022 elections.
As of press time, tatlo ka impeachment complaints ang ginapangatubang ni Sara nga lunsay nag-ugat sa kontrobersyal nga confidential funds sang Office of the Vice President kag Department of Education nga iya man anay ginpamunuan antes siya nagbiya sa Gabinete ni Marcos.
