Ginkumpirma sang Philippine Coast Guard (PCG) nga nag-overheat ang BRP Teresa Magbanua nga amo ang nagabantay sa hulag sang ‘monster ship’ sang China sa Bajo de Masinloc ukon Panatag Shoal sa West Philippine Sea.
Suno kay PCG spokesperson for WPS Commodore Jay Tarriela, Lunes sang aga sang natabo ang overheating sang auxiliary engines sang Teresa Magbanua rason nga ginpabalik ini anay sa Port of Bataan.
Ang magabulos sa pagbantay amo ang BRP Gabriela Silang nga halos katunga lamang sang kadakuon sang monster ship sang China Coast Guard (CCG).
Suno kay Tarriela, sang nagbiya ang Teresa Magbanua sa Panatag Shoal, ginhingalitan man sang mga Chinese ang kahigayunan kag nagpalapit sila sang ginabanta 67 nautical miles halin sa coastline sang Zambales.
Nahibaluan nga 10 ka adlaw na nga nagatinir ang ‘monster ship’ sang Beijing sa exclusive economic zone (EEZ) sang Pilipinas.
Una naman nga nag-deploy ang PCG sang vessels kag aircraft kag ginradyuhan pa ang CCG vessel, apang sa baylo nga magpamati, nagpadala man ang China sang ila kaugalingon nga helicopter.
“Despite the discrepancy in the size of the monster ship, the Philippine Coast Guard remains committed to deploying our vessels,” suno kay Tarriela.
Sa bahin sang National Maritime Council (NMC), may gin-file na nga diplomatic protest batok sa iligal nga presensya sang CCG sa EEZ sang Pilipinas nga isa ka maathag nga paglapas sa Philippine Maritime Zones Act, 1982 United Nations Convention on the Law of the Sea, kag 2016 Arbitral Ruling.
