Ginpa-Bombo sang isa ka opisyal sang Barangay Jibao-an, Sta. Barbara, Iloilo ang pila ka mga residente sang Deca Homes – Sta. Barbara kasunod sang pagbilin sang ila mga basura sa nasambit nga lugar.
Sa interview sang Bombo Radyo kay Kevin Soria, Barangay Kagawad, iya ginpahayag nga ila natukiban nga naghalin sa isa ka residente sang nasambit nga subdivision ang basura bangud sa pangalan nga nakasulat sa karton.
Suno kay Soria, ginpanginwala sang natungdan nga residente nga siya ang naghaboy sang basura apisar sang nakapaskil sini nga pangalan.
Gin-athag man sini nga ginpatawag sang punong barangay sang Balabag, Pavia ang naghaboy sang basura agud nga atubangon sini ang iya nga kapaltahan.
Nahibaluan nga masami ginahaboyan sang mga residente sang Deca Homes – Sta. Barbara ang amo nga porsyon sang Jibao-an kon sa diin, ginahapit lamang nila kon sila ang maglabay gamit ang ila salakyan.
