Gin-atrasar sang Israel ang cabinet meeting agud nga ratipikahan ang ceasefire sa Hamas militants.
Ini kasunod sang Israeli airstrikes sang nagligad nga gab-i nga nagpatay sang 77 ka mga tawo sa Gaza.
Suno sa health ministry, lakip sa mga biktima amo ang 12 ka mga tawo nga nagapuyo sa residential block sa Sheikh Radwan neighbourhood sa Gaza City.
Kun basehan ang Gaza health ministry, 81 ka mga tawo ang napatay sa nagligad nga 24 ka oras kag 188 ang nasamaran. Base naman sa Palestinian Civil Emergency Service, at least 77 sa sini ang napatay halin sang nasapubliko na ang ceasefire.
Suno kay Hamas senior official Izzat el-Reshiq, sundon gihapon nila ang ceasefire deal nga naka-schedule nga mangin epektibo sa Domingo nga amo ang magatapos sang 15 ka bulan nga gyera sa Palestine.
Matandaan nga nalab-ot sang Myerkules ang agreement matapos nagpatunga ang Qatar, Egypt, kag ang United States.
Sa inisyal nga reports, ginapahayag nga anum ka semana ang initial ceasefire phase.
Ginaalegar nga nalakip diri ang pag-atras sang pwersa sang Israel sa Gaza Strip kag ang paghilway sang mga bihag sang Hamas bilang kabaylo sang Palestinian prisoners nga didto naman sa Israel.
Nalakip sa Phase 1 ang 33 ka Israeli hostages lakip na ang mga kababainhan, may kabataan, kag may mga kalalakihan nga masobra na sa 50 ang edad.
Ginapahayag nga magasugod naman ang negosasyon para sa ikaduha nga phase sa ika-16 nga adlaw sang phase one kun sa diin ginalauman nga malakip ang iban pa nga mga bihag, maimplementar na ang permanent ceasefire, kag dalayon na nga i-withdraw sang Israel ang ila tanan nga pwersa-militar sa Gaza.
Ang third phase naman amo ang ginalauman nga magatutok sa pagbalik sang mga bangkay kag umpisahan man ang pagkaayo sa Gaza sa idalom sang superbisyon sang Egypt, Qatar, kag United Nations.
Kun magmadinalag-on ang nakabutang sa kasugtanan, ginalauman nga mabuhin-buhinan ang tension nga subong naglapta na pati sa West Bank, sa Lebanon, Syria, Yemen kag Iraq, kag mangin ang isyu anay sang ginakahangaw-an nga all-out war sa tunga sang Israel kag Iran.
Photo: Hasan N. H. Alzaanin/Anadolu/Getty Images
