Nagpasalig si Iloilo City Lone District Representative Julienne “Jam-jam” Baronda nga pangitaan sang pondo ang Mandurriao Public Market kon may kakulangan sa budget sini.
Sa interview sang Bombo Radyo kay Representative “Jam-jam” Baronda, iya ginpahayag nga indi gid malikawan nga ma-delay ang proyekto ilabi na kon may mga problema nga ginapangatubang ang kontraktor lakip na ang budget.
Suno kay Baronda, P100 million ang pondo nga ginpain sa amo nga proyekto apang P90 million lamang ang na-implementar.
Nagapati man ang natungdan nga ginatinghuwaan sang City Engineers Office nga makapan-kapan ang delay sang proyekto agud liwat mabuksan kag magamit sang mga pumuluyo.
Ginalantaw man ni Baronda nga hatagan sang ayuda ang mga vendors sa Mandurriao Market nga apektado sang huol nga natuga sang delay nga pagpatukod.
