Balik trabaho na ang mga personnel sang Bansoy Construction sa ginakaayo nga dalan sa Barangay Sinamay, Alimodian, Iloilo matapos ang malapit isa ka bulan man nga ginbayaan kag gin-untatan ang proyekto.
Sang damlag lang, wala ginhuna-huna ni Engr. Romeo Andig, Head sang Iloilo Provincial Engineer’s Office, nga pabay-an sang contractor ang isa ka porsyon sang dalan nga inug-semento kag bangud sa kaugot man sang pumuluyo, nagtanom ang mga ini sang saging kag niyog sa duta.
Sa interview sang Bombo Radyo kay Engr. Andig, iya ginpahayag nga bangud sa kapabayaan sang contractor, ginpatawag sila sang Iloilo Provincial Government agud mahibaluan kun ano ang natabo sa isa sa sulod sang malapit isa ka bulan nga wala sila makapakita sa area.
Gintu-ad sang Bansoy Construction suno sa iya nga may internal problem sila nga wala na nila gindetalye pa kun ano apang posible nga ginkulang sa working capital ang contractor.
Apang pahayag ni Engr. Andig, may mga proyekto naman sadto anay nga ginakaptan ang Bansoy Construction nga wala man gani nagakapalpak.
Ginpasikto sang Iloilo Provincial Government sa contractor kun masarangan pa bala sini nga tapuson ang proyekto kag nagpromisa man sila nga trabahuon nila ang nabilin nga kalay-uhon.
Ang completion date sang reblocking, repair kag widening sang P18.7 million nga Alimodian-Poblacion-Sulong-Sinamay-San Miguel road ang natalana kuntani sang Disyembre 18, 2024 sa diin sang amo nga petsa, yara sa 62.7 percent na ang accomplishment.
Bangud delayed na dugang sang natungdan, may yara na sang liquidated damages nga malapit P7,000 nga penalidad ang contractor humalin sang Disyembre 18, 2024 tubtob nga indi matapos ang dalan.
