Pilason ang isa ka lalaki matapos ginlabo sang iya nga bayaw sa Brgy. Natividad, Lambunao, Iloilo.
Ang biktima amo si Rodnel Casiple Zabala, kasado, 29 anyos samtang, ang suspek naman amo si Noel Langgasca, kasado, 52 anyos kag lunsay residente sang nasambit nga lugar.
Sa interview sang Bombo Radyo kay PCapt. Winston Biadog Deputy Chief of Police, iya ginpahayag nga nag-inom-inom ang biktima kag suspek kaupod ang iban pa nila nga himata kun sa diin may nagluntad nga pagbinaisay sa tunga sa ila nga duha.
Gindul-ong sang biktima kag iban pa nila nga kaupdanan ang suspek sa ila nga balay kag gilayon nga nagbalik apang nag-apas liwat ang suspek kag didto nagluntad ang pagpanglabo.
Pilas sa ulo, likod, kag wala nga butkon ang naagom sang biktima, kag gilayon nga gindala sa ospital.
Padayon naman nga ginapangita sang kapulisan ang suspek nga gilayon nagpalagyo matapos nga gin-ubra ang krimen.
