Patay ang nobya nga backrider matapos nabunggu-an sang nagasunod nga salakyan nga ginamaheno sang amay sang iya nga nobyo sa national highway sang Brgy. Tabuan Pani-an, Estancia, Iloilo.
Ang driver sang salakyan nagaedad sang 42-anyos, negosyante, samtang ang naga-maneho naman sang motorsiklo amo ang iya anak nga si alias Dave, 22. Sila ang lunsay residente sang amo man nga banwa.
Ang backrider naman sa motorsiklo amo ang nobya ni alias Dave kag residente man sang amo nga banwa.
Sa interview sang Bombo Radyo kay Patrolman Cesar Medina, imbestigador sang Estancia Municipal Police Station, iya ginapahayag nga lunsay halin sa banwa sang Carles ang duha ka salakyan kun sa diin, nag-serbe nga convoy ang Nissan Navarra nga ginamaneho sang amay kag papauli na kuntani sa banwa sang Estancia.
Base sa imbestigasyon, hinali lang nga naghinay ang pagpadalagan sang motorsiklo kag nalab-ot ini sang nagasunod nga salakyan.
Bangud sa impact, nakaagum sang menor nga kapilasan ang driver sang motorsiklo samtang gindeklara nga dead on arrival ang nobya nga backrider sini.
Ginahibalo pa kun magapasaka sang kaso ang pamilya sang backrider batok sa driver sang salakyan.
