Pinal na ang desisyon ni US President-elect Donald Trump nga ibalik ang access sa TikTok sa Estados Unidos kun makapungko na siya bilang presidente, apang sa kondisyon nga ang katunga ukon 50% sang social media app ang dapat nga panag-iyahan sang US investors.
Pahayag ni Trump, paagi sa sini nga joint venture, maluwas ang TikTok, mabutang sa maayo nga mga kamot, kag magamit liwat sang masobra 170-million Americans.
Domingo sang hapon oras diri sa Pilipinas sang nag-notify ang TikTok nga nangin epektibo na ang pag-ban sang Estados Unidos batok sa ila nga application. Kasunod ina sang pagpabor sang US Supreme Court sa desisyon sang Congress nga dumilian na nga maka-operate sa bilog nga pungsod ang TikTok epektibo Enero 19 kun indi ini mabaligya sa non-Chinese buyer.
Ginsaad nga rason sa pag-ban sa sini nga short-video app amo ang posibilidad nga gamiton ini sang China sa pagpang-espiya kag pagpalapta sang propaganda.
Bisan nga ma-revive man ang TikTok kun makapungko na si Trump, ang shutdown sa sini nga aplikasyon ang ginalantaw nga may daku nga impact sa relasyon sang US kag China kag US politics.
Ini bangud iya sang Chinese ang parent company sang TikTok nga amo ang ByteDance nga ginakabig nga second-most valuable private technology company.
Kadungan sa pag-ban sa TikTok, nangin offline man kag wala na sa US app stores ang iban pa nga applications sang ByteDance lakip na ang video editing app nga CapCut kag lifestyle social app nga Lemon8.
