Indi na magpasaka sang kaso ang nagapanag-iya sang balay nga gin-arado sang isa ka van sa Tagbak, Jaro, Iloilo City.
Ang driver sang van amo si Jerry Tolentino Gonzales, 53-anyos, kag residente sang Ledesma St. Pototan, Iloilo.
Sa interview sang Bombo Radyo kay Liezel Turba, tag-iya sang balay, iya ginpahayag nga naghumok ang iya tagipusuon kasunod sang paghayo sang driver sa iya nga P70,000 na lang iya ibayad bangud sa ginapangatubang man sini nga problema.
Nahibaluan nga ang driver sang van kag ang nagbunggo-patay sa duha ka mga babaye sa Tubigan, Zarraga ang isa lang.
Suno kay Turba, una nga ginsukot nila sang P80,000 ang driver apang nag-hayo ini nga P70,000 lamang ang iya masarangan nga mabayaran.
Ginpahayag man sini nga tuman ang pagpakitluoy sang pamilya sang driver nga mag-areglo na lang kasunod man sang mga kaso nga ginapangatubang sini kasunod sang pagkapatay sang duha ka mga babaye sa Zarraga.
Kon balikan, ginpahayag sang Zarraga Municipal Police Station nga nag-panic ang driver matapos nga na-arado ang balay rason nga nadalasa sini ang duha ka babaye nga nagasakay sa motorsiklo.
Matapos magluntad ang insidente, gilayon nga nanaog sa van ang driver kag nagsakay sa tricycle agud magpadulong sa Leganes Municipal Police Station kag didto magsungka.
Gilayon naman nga gin-turnover naman sang Leganes MPS sa Zarraga MPS ang driver sang van.
