Matabo na subong nga semana ang madugay na ginabantayan sang lesbian, gay, bisexual, transgender, and questioning (or queer) ukon LGBTQ+ couples sa Thailand.
Sa Huwebes, Enero 23, legal na nila nga ma-rehistro ang ila kasal.
Ang Thailand ang una nga pungsod sa Southeast Asia kag pangatlo sa Asya — sunod sa Taiwan kag Nepal — nga magakilala sa kasal sang same-sex couples.
Sa Bangkok nga amo ang kapital sang pungsod, may ginahanda nga daku nga selebrasyon para nga ma-facilitate ang kasal sang ginatos ka same-sex couples.
Madugay na nga maayo ang reputasyon sang Thailand sa pagbaton sa iban kag sa ‘inclusivity’, apang binudlayan man ini nga makapasar sang marriage equality law bangud sa ila nga conservative values.
Sang Septyembre 24 sang opisyal nga nasulat ang landmark marriage equality bill sang pungsod nga gin-endorso mismo ni King Maha Vajiralongkorn.
Bangud sini nga mga pagbag-o, hingalitan sang Tourism Authority of Thailand (TAT) ang trend kag magapatigayon na lamang sang trade meetings kag mga negosyo nga ang target amo ang same-sex couples nga nagaplano nga magpakasal.
Suno kay Siripakorn Cheawsamoot, tourism deputy governor for Europe, Africa, the Middle East and the Americas, madamo sila sang marketing activities para sa LGBTQ+ people agud nga mabuligan ang private sector nga malab-ot ang demand kadungan sini nga trend.
Makabulig man ini suno sa department nga malab-ot sang Thailand ang ila 10.6 million nga target arrivals sang mga turista subong nga tuig.
May naka-schedule na nga tourism trade meetings sa Pebrero sa Bangkok nga magahatag ligwa sa 70 tourism operators sa Thailand nga makigkita sa agents halin sa US, Canada, Mexico, Brazil, Middle East, Europe, Asia kag Australia.
Masako naman ang Thailand sa pag-inspect sang tourism products sa Bangkok, Pattaya, Chiang Mai, Koh Samui kag Krabi.
Magluwas diri, may apat man ka airports nga nagapakig-angot sa TAT para nga maka-promote sang events para sa “Amazing Thailand Romance Month” kaangay sang pre-registration kag lucky draw on arrival.
