Magaserbi bilang salog ukon flooring sang extension stages sang Dinagyang Festival 2025 ang board ukon plywood nga human sa recycled plastics.
Sa interview sang Bombo Radyo kay Engineer Niel Ravena, head sang Iloilo City General Services Office (GSO), iya ginpahayag nga ang gingamit nga plastic sa amo nga plywood ang naghalin gid sa mga basura.
Suno kay Ravena, low density waste nga plastic ang ginhimo nga plywood kon sa diin, ginpaidalom sa ‘upcycle’ rason nga gintawag man nga eco board.
Ginpahayag man sang natungdan nga ginakonsiderar man sang ila talatapan nga ang tanan nga matipon nga plastic sa Dinagyang Festival ang ipadala sa nagahimo sang eco board agud magamit.
Nagapati man si Ravena nga mas durable ang amo nga plywood kon ikumparar sa typical nga plywood nga madasig maggabok.
Nahibaluan nga ginapadala pa sa Manila ang makolekta nga mga plastic agud nga iproseso antes mangin isa ka eco board.
Ginaplano naman sang GSO nga magkuha sang mga low density plastic halin sa Calajunan Landfill agud nga ipadala man sa Manila kag iproseso.
