Napuno sang mga deboto ni Señor Sto. Niño ang ginpatigayon nga Fluvial Parade sang San Jose Parish Placer kaangot man sa Dinagyang Festival 2025.
Sa interview sang Bombo Radyo kay Elnora Valladolid, commentator sang San Jose Parish Placer, iya ginpahayag nga lamharon pa lang siya, nagaupod na siya sa iya ginikanan agud nga magpartisipar sa kahiwatan.
Suno kay Valladolid, nangin tradisyon kag panata na ini nila kada tuig sa pagselebrar sang Dinagyang Festival.
Isa naman sa nagpahugot sang iya pagtuo kay Señor Sto. Niño, amo ang pagbugay sa iya sang iya anak, kon sa diin, nagbusong siya sa edad nga 35-anyos.
Ginakabig man sini nga isa ka dako nga blessing ang pag-angkon niya sang anak matapos naghulat sang malawig nga tinuig.
Nahibaluan nga pagkatapos sang Fluvial Parade kag Solemn Foot Procession, may ginhiwat nga misa kag blessing sang mga Sto. Niño images sa nasambit nga Parokya.
