Patigayunon karon sa gab-i ang two-hour grand religious “sadsad” ukon merrymaking sa atubang sang San Jose Placer Parish Church malapit sa Plaza Libertad diri sa City Proper.
Maga-umpisa ini 7:00 sa gab-i kag ginalauman nga dugukan sang linibo nga mga deboto.
Sa sini traditional act of devotion, kinaandan nga may mga dala nga imahen sang Señor Santo Niño mga deboto nga nagasaot samtang nagapasalamat, nagapangamuyo, ukon nagangayo sang milagro sa Holy Child.
Madamo man nga mga deboto ang nagapakigbahin nga naka-eksperyensya sila sang mga milagro matapos nagtambong sa religious events kaangay sini.
Lain ini nga religious sadsad sa maduagon nga Sadsad sa Calle Real nga isa naman ka street celebration nga matabo buwas, Enero 26, halin 2 p.m. tubtub 5 p.m.
Ini nga event ang patigayunon sa heritage zone sang syudad halin sa Freedom Grandstand pakadto sa Calle Real pagkatapos mismo sang Dinagyang Tribes Competition.
Anum ka tribu ang magapasakop sa Sadsad sa Calle Real nga amo ang Tribu Panaad, Tribu Calubihan, Tribu Familia Sagasa, Tribu Irong-irong, Tribu Aninipay, kag Tribu Halimaw.
Sa kada tuig, nakasentro sa pagtuo kay Señor Sto. Niño ang selebrasyon sang Dinagyang Festival. Subong nga 2025, may tema ini nga “Buhi nga Pagtuo sa Kinabuhi sang mga Ilonggo”.
