Nadepensahan sang world number one kag Italian tennis player nga si Jannik Sinner ang iya titulo sa Australian Open.
Nakuha sang 23-anyos nga player ang kadalag-an matapos ginlutos si world number 2 Alexander Zverev sang Germany sa straight sets, 6-3, 7-6(4), 6-3 sa Rod Laver Arena.
Siya ang una nga Italian nga nakadaog sang tatlo ka Grand Slams.
Bangud sini, nabutang naman ang pangalan ni Sinner sa linya nanday Andre Agassi, Roger Federer kag Novak Djokovic bilang male players nga madinalag-on nga nakadepensa sang title sa Australian Open subong nga siglo.
Ini na ang iya 19th title sa iya karera kag napalawig pa ang iya winning streak sa 21.
Sang 2024, ginlutos sini sa five sets si Daniil Medvedev sang Russia nga amo ang nangin lyabe sa iya una nga Grand Slam.
Nabulsa sang Italian great ang kampyonato apisar sang doping case nga iya ginapangatubang matapos duha ka beses nga nagpositibo sa traces sang steroid clostebol sang nagligad nga tuig.
