Nagpatigayon sang misa si former Iloilo City Mayor Jed Patrick Mabilog sa iya compound kasunod sang paghatag sa iya sang executive clemency ni Pres. Ferdinand “Bongbong” Marcos.
Sa interview sang Bombo Radyo kay Former Mayor Mabilog, iya ginpahayag nga dako ang iya pagpasalamat sa Ginoo bangud wala pa sang isa ka tuig nga pagpauli niya sa Pilipinas, gilayon natuman ang iya ginapangamuyo.
Suno kay Mabilog, wala nadula ang gugma sang mga nagasuporta sa iya kag nagapati tubtob nga naguwa ang kamatuoran.
Nagpasalamat man ang anay alkalde kay President Marcos Jr. sa kahigayunan nga ginhatag sa iya ilabi na sa pagpati sini sa nangin resulta sang maayo nga serbisyo sa Iloilo City.
Nagapati man ang natungdan nga ang ‘unity’ ang nangin balashan man sa paghatag sa iya sang clemency.
Wala man napunggan ni Mabilog nga magtulo ang luha samtang nagahatag sang mensahe kasunod sang ginpatigayon nga misa.
Kon matandaan, 2017 sang nagbiya si Mabilog sa pungsod matapos nga gin-angot siya iligal nga druga ni Former President Rodrigo Duterte.
