Nagpasalig ang Iloilo Festivals Foundation Incorporated nga mas mangin enggrande, pinasahi, kag maga-improve pa gid ang nagkalain-lain nga mga kompetisyon sa Dinagyang Festival.
Ini ang ginalakipan sang Ilomination, Sadsad sa Calle Real, Kasadyahan sa Kabanwahanan, kag Dinagyang Tribes competition.
Sa interview sang Bombo Radyo kay Mr. Eric Divinagracia, Artistic Director sang Iloilo Festivals Foundation Incorporated, iya ginpahayag nga ang mga performances sang contingents kag tribu sa nagkalain-lain nga kompetisyon ang resulta sang pagbinuligay sang mga artists kag performers nga samtang nagadugay, mas naga-improve pa gid ang ila creativity kag artistry.
Suno kay Divinagracia, ini ang magabunga sang mas manami pa nga performances sa masunod nga tuig.
Dugang niya, bangud nga national na ang sakop sang Ilomination, ginalauman nga mas madamo pa nga mga syudad kag probinsya sa Pilipinas ang mapabutyag sang interes nga magpasakop.
Ginpahayag naman sang natungdan nga bukas sila sa posibilidad nga magseparar na gid ang Kasadyahan sa Kabanwahanan gikan sa Dinagyang Festival agud mas ma-highlight ang nanuhay-tuhay nga festivals sa Iloilo kag mas madamo nga banwa ang makapasakop.
