ILOILO – Nadugangan pa sang 27 ka mga bag-o nga kaso sang Hand, Foot and Mouth Disease sa probinsya sang Iloilo sa sulod sang isa ka semana.
Base sa data sang Iloilo Provincial Epidemiology and Surveillance Unit humalin sang Enero 1 tubtob Enero 18, 2025, may yara sang 48 ka mga kaso sang HFMD sa diin mas manubo ini kun ipaanggid sang 2024 nga may 92 cases sa kapareho nga period.
Ang Hand, Foot and Mouth Disease ang isa ka makalalaton nga balatian nga nagaapekto sa mga kabataan. Ang sintomas ang ginalakipan sang manubo nga hilanbat, mouth sores, kag rashes sa kamot kag tiil.
Mahimo nga maglaton ang balatian pinaagi sa pagpangatsi, pag-ubo kag pag-uyat sang mga gamit nga nauyatan sang tawo nga may HFMD.
23 sa 43 ka mga local government units ang may recorded cases sang Hand, Foot and Mouth Disease sa diin ang Carles ang may walo ka kaso; ginasudan sang Cabatuan kag Lemery nga may tag apat; kag Alimodian, San Joaquin kag Barotac Nuevo nga may tag duha ka mga kaso.
Nagapanawagan ang Iloilo Provincial Health Office nga i-practice gid ang regular nga paghugas sang kamot, masami nga mag-disinfect kun nag-uyat sang ano man nga pagkabutang kag magkadto sa malapit nga rural health unit ukon health center kun nakabatyag na sang sintomas.
