Pabor si Iloilo City Councilor Ely Estante nga magpasar sang resolution ang Sangguniang Panlungsod nga nagamandu sa singer nga si JK Labajo nga maghimo sang public apology bangud sa pag-translate sini sa Hiligaynon sang tinaga nga nagapamuyayaw nga kabahin sang iya hit song nga “Ere”.
Ang session sang City Council ang hiwaton bwas nga adlaw, Enero 30, sa diin ginapaabot man ang pag-deliver sang privilege speech ni City Councilor Alan Zaldivar nahanungod sa singer.
Sa interview sang Bombo Radyo kay Councilor Estante, iya ginpahayag nga nagakadapat nga magpangayo sang pasaylo ang singer, sa video man ina ukon pinaagi sa sulat nga i-post sa iya social media.
Una nga ginpahayag ni Iloilo City Mayor Jerry Trenas nga indi niya pag i-tolerate ang ginapahayag pagpamuyayaw sang singer nga nagkanta sa concert kadungan sang selebrasyon sang Dinagyang Festival 2025.
Suno kay Estante, indi nagakabagay ang amo nga tinaga nga ihambal sa atubang sang madamo nga tawo ilabi na nga ang Dinagyang isa ka religious festival nga nagapasidungog kay Señor Sto. Niño.
Dugang niya, mas maayo man nga magplastar ang syudad sang mga guidelines sa mga performers nga magabisita sa Iloilo City agud indi na ini matabo liwat.
