Malapit na sa 40 ang patay matapos natabo ang stampede sa Maha Kumbh Mela sa India kadungan sang pagtilipun sang minilyon ka mga tawo agud nga magpaligo sa ginakabig balaan nga suba.
Ginpahayag nga pila sa mga napatay ang nagsuprer sang atake sa korason kag may mga comorbidities kaangay sang diabetes.
Base sa police sources, amat-amat na nga ginatugyan sa ila tagsa ka pamilya ang mga bangkay. Wala pa sang official numbers nga ginpaguwa ang otoridad kaangot sa casualties bangud tuman pa subong kasako sa crowd management.
Gin-alegar nga nagsugod ang stampede ang ginluksuhan kag ginsalakay sang mga deboto ang mga barikada sang ala una tubtub alas dos sang kaagahon.
Nahibaluan nga ini nga Hindu festival amo ang ginakabig nga pinakadaku nga pagtilipon sang mga tawo nga ginalauman nga magalab-ot sa 400-million sa masobra anum ka semana.
Mas madamo pa ini ipaanggid sa Haj pilgrimage sa Saudi Arabia nga ginkadtuan sang 1.8 million ka mga tawo sang nagligad nga tuig.
Sa sulod pa lamang sang duha ka semana, lapit na sa 200-million ang nagtambong sa festival sa India suno sa mga opisyal kag masobra na sa 50-million ang nakapapatigayon sang holy dip.
Nagapati ang deboto nga mga Hindu nga ang pagpaligo sa tatlo ka balaan nga suba ukon sa Ganga, Yamuna, kag Saraswati amo ang nagadula sang ila nga mga sala kag nagaluwas man sa ila sa siklo sang kabuhi kag kamatayon.
Antes ini nga trahedya subong nga 2025, may kaangay man nga stampede sang 2013 sa amo man nga festival kun sa diin 36 ang napatay.
