Kumpirmado ang attendance ni Kevin Quiambao sa Doha, Qatar sa masunod nga bulan samtang naga-preparar ang Gilas Pilipinas sa third and final window sang FIBA Asia Cup Qualifiers kag FIBA Asia Cup.
Matandaan nga nagsuprer ini sang right ankle injury sa iya imbukada nga hampang sa Korean Basketball League sini nga Enero apang nakabalik naman sa game sang Martes.
Suno kay Gilas head coach Tim Cone, nag-update ang two-time UAAP Most Valuable Player nga 100% nga handa ini sa byahe sa Doha para sa ila nga training camp para handaan ang hampang kontra sa Chinese Taipei kag New Zealand.
Indi naman maka-upod si Japeth Aguilar sa training camp bangud sa personal nga rason apang mahampang gihapon ini sa Pebrero sa Taiwan.
Mabuhinan naman ang pwersa sang Gilas bangud kumpirmado nga indi makahampang sa FIBA Asia Cup ang big man sang national team nga si Kai Sotto bangud sa ACL injury nga naangkon sa hampang sa Japan nga nagakinahanglan sang siyam ka bulan nga pagpahuway. Ginalauman nga sa una nga semana sang Pebrero magapaidalom ini sa surgery.
Nahibaluan nga antes pa man ang final window, kuwalipikado na ang Pilipinas sa FIBA Asia Cup sa Saudi Arabia sa Agusto, apang magasulod gihapon ini sa training camp sa Qatar kag magahampang batok sa Chinese Taipei kag New Zealand sa qualifiers bilang preparasyon sa aktwal nga tournament.
