Madayon na ang renegotiation sang Iloilo City Legal Office kaangot sa joint venture agreement sang city government kag Double Dragon Properties Corp kaangot man sa Guimaras Iloilo Ferry Terminal (GIFT) Project.
Sa interview sang Bombo Radyo kay City Councilor Sedfrey Cabaluna, Chairman sang Committee on Transportation sang City Council, iya ginpahayag nga paagi sa resolusyon nga ginpasar sang konseho, mahatagan sang kahigayunan ang City Legal Office nga makig-istorya sa bahin sang Double Dragon Properties Corp.
Suno kay Cabaluna, sugod 2023 sa ila pagpatigayon sang pagsinapol, wala gid sang bisan isa sa committee hearing ang gintambongan sang nasambit nga kompanya.
Sang ginpatawag man ang amo nga kompanya sang City Legal, wala man sila sang may ginplastar rason nga gindirekta na lang sang komitiba ang renegotiation sang joint venture agreement.
Ginpahayag man sini nga kinahanglan i-renegotiate ang agreement bangud tuman ka disbentaha sa bahin sa city government.
Ang letter sang renegotiation ang mangin epektibo 60 days sugod mabaton sang City Legal Office kag Double Dragon Properties Corp.
Nahibaluan nga halos duha ka tuig matapos gin-umpisahan ang pagrepaso liwat sang Joint Venture Agreement (JVA) para sa Guimaras-Iloilo Ferry Terminal Services (GIFTS) sa Parola Wharf.
Ginpirmahan sang 2012 sa panahon sang administrasyon sadto ni Mayor Jed Patrick Mabilog, ginhatagan ang Double Dragon Properties Corp sang eksklusibo nga 25 ka tuig nga kinamatarong sa pagdevelop kag pag-operate sang 13,000-square-meter terminal complex.
Ang Joint Venture ang nagahatag sa Double Dragon sang 25 year exclusive rights sa pagkolekta sang terminal, berthing and cargo fees, kag ang pagparenta sang mga commercial spaces sa terminal complex.
Sa idalom sang JVA, ang bahin sang syudad naglakip sang 1-5% sang kita sa gross terminal fee, 1% sang gross berthing fee revenues, 1% sang gross cargo fee revenues, kag 1% sang gross rental revenue (wala labot ang VAT).
