Nagapang-edaron 19 tubtob 25-anyos ang tatlo ka mga Indian National nga suspek sa pagtiro-patay sa isa ka pastor sa Brgy. Anilao, Pavia, Iloilo.
Ang biktima amo si Douglas Jover, 63-anyos kag residente sang Brgy. Quintin Salas, Jaro, Iloilo City.
Sa interview sang Bombo Radyo kay Police Major Harold Rendora, Chief of Police sang Pavia Municipal Police Station, iya ginpahayag nga napasaka na ang kaso nga murder sa tatlo ka Indian National.
Suno kay Rendora, nagahulat na lang ang talatapan sang desisyon sang prosecutors office kag pananglitan nga makataan sang probable cause, gilayon ipaguwa man ang warrant of arrest batok sa mga suspek.
Dugang pa sang natungdan nga may ginakaptan na sila nga mga ebidensya nga nagapapag-on man sa kaso.
Utang nga P300,000 sa online crypto currency ang isa sa motibo nga ginalantaw sang otoridad kon ngaa ginpatay ang pastor.
Aminado naman ang Pavia MPS nga wala pa sila sang mabug-at nga ebidensya nga nagatudlo sa mga Indian National sa paghimo sang amo nga krimen.
Nahibaluan nga nag-agum ang pastor sang igo sang bala halin sa ulo kag naglapos sa sag-ang sini nga gintunaan man sang iya kamatayon.
