Nalakip ang isa ka Filipino Police Colonel sa napatay sa air collision sang military helicopter kag passenger jet sa Washington Patomac River sa Estados Unidos.
Suno kay Interior Secretary Jonvic Remulla, ang nasambit nga Pinoy ang myembro sang Philippine National Police (PNP).
Gintumod man ni PNP Public Information Office acting chief Police Colonel Randulf Tuaño nga ang biktima amo si PNP Supply Management Division chief Police Colonel Pergentino Malabed, Jr. nga sa amo nga tion, yara sa iya official travel para sa pre-delivery inspection sang 2,675 units sang all-purpose vests.
Ginpahayag ni Tuaño nga sang Enero 22, naglupad si Malabed upod ang isa ka non-commissioned officer kag isa ka non-uniformed personnel halin sa Pilipinas padulong sa India para sa pre-delivery inspection sang mga vest.
Ginkuha ni Malabed ang lima sa mga vest kag naglupad pakadto sa Estados Unidos para sa dugang nga testing sang Enero 27.
Ang police official nagkadto sa Kansas para sa isa ka exit call upod sa Police Attaché sang Washington D.C. nga si Police Colonel Moises Villaceran.
Base sa unofficial report sang Office of the Police Attaché sa Washington D.C., orihinal nga natalana kuntani nga magbalik sa Pilipinas si Malabed sa Pebrero 2 apang ginpakamaayo sini nga magpadulong sa South Carolina agud magbisita sa iya utod.
Nakilala si Malabed paagi sa passport nga nakit-an sa iya lawas. Apang suno kay Tuaño, natalana nga maglupad ang iya asawa padulong sa US agud personal nga makilala ang iya bangkay.
Suno kay Bombo Valerie May Baqueriza-Belleza, international correspondent sa USA, indi pa maathag kon ngaa ang isa ka regional jet kag isa ka helikopter sang U.S. Army nagbungguanay sa isa ka airport sa Washington, nga nagpatay sang 67 ka tawo kag ginakabig nga pinakamakamamatay nga kalamidad sa kahawaan sang Estados Unidos sa sulod sang kapin sa 20 ka tuig.
