Nagbulos ang Chinese monster ship sa iligal nga pagpatrolya sa teritoryo sang Pilipinas matapos nga gintabog sang Philippine Coast Guard (PCG) ang isa pa ka barko sang China.
Suno sa ahensya, nagmadinalag-on ang BRP Teresa Magbanua nga mapunggan ang China Coast Guard vessel CCG-3304 nga mag-abante pa sa baybayon sang Zambales. Apang sa subong, nag-abot ang monter ship ukon ang CCG 5901 nga amo liwat ang ginabantayan sang barko sang Pilipinas.
Ginatinguhaan sang PCG nga mapabilin ang distansya sang monster ship sa ginabanta 110-115 nautical miles halin sa coast sang Zambales.
Nagabalusay man sa pag-radyo ang PCG kag CCG sa isa kag isa, kun sa diin ginasulit-sulit sang Pilipinas nga nagalapas ang China sa United Nations Convention on the Law of the Sea (UNCLOS) kun sa diin signatory man ang Beijing.
Magluwas sa monster ship nga amo ang pinakadaku nga coast guard ship sa kalibutan, may na-monitor man anay ang PCG nga CCG-3502 kag CCG-3103 nga malapit man sa probinsya sang Zambales sang nagligad nga semana.
