ILOILO CITY – Linibo nga mga deboto ni Nuestra Señora de la Candelaria ukon Our Lady of Candles ang nagtipon subong sa Iloilo City para sa Jaro fiesta nga isa sa pinakadaku nga kapistahan sa Western Visayas.
Nag-umpisa ang selebrasyon sang pista paagi sa misa sa main altar sang Jaro Cathedral 4:00 kaina sang kaagahon kag magapadayon ang iban pa nga mga misa tubtub 8:00 karon sa gab-i.
Alas otso subong nga aga, may yara sang Solemn Pontifical Mass nga ginpangunahan ni Most Rev. Midyphil B. Billones, D.D., Auxiliary Bishop of Cebu, nga nabatian man sa Bombo Radyo kag nalantawan man sa tanan nga digital platforms sang estasyon.
Ang iban nga mga misa patigayunon sa Pope John Paul II Gym nga tupad sang katedral.
Alas kuatro naman karon sa hapon, balantayan ang prusisyon kun sa diin nagkalain-lain nga mga religious group, mga organisasyon, mga eskwelahan, kag mga deboto ang maga-upod sa parada sa palibot sang Jaro Plaza.
5:30 karon sa hapon may yara sang isa pa gid ka misa sa main altar sang Jaro Cathedral.
Ang pista ni Nuestra Señora de la Candelaria amo ang isa sa pinaka-ginadugukan nga religious celebrations sa Iloilo ilabi na bangud siya man ang patrona sang Western Visayas.
Kagab-i, ginpatigayon ang koronasyon sa imahe ni Candelaria sa pagpanguna ni Most Rev. Jose Corazon T. Tala-oc, D.D., Bishop sang Kalibo, kaupod si Rev. Fr. Jose Alberto E. Guillen kag Rev. Msgr. Ramon Masculino.
Ang tradisyon ang kabahin sang pagdumdum sa 1981 apostolic visit ni anay Pope John Paul II kag kag karun St. John Paul sa Jaro Cathedral nga amo mismo ang nagkorona sa nasambit nga milagroso nga Marian image.
Sa mensahe ni Jaro Archbishop Most Reverend Jose Romeo O. Lazo, D.D., nangagda ini sa mga tumuluo nga mga Katoliko nga updan ang selebrasyon sang pista ni ‘Nanay Cande’. Ini nga selebrasyon ang espesyal man subong nga tuig matapos gindeklarar ni Pope Francis ang 2025 bilang Jubilee Year nga may tema nga “Pilgrims of Hope” ukon Peregrino sang Paglaum.
