Gin-appoint ni Pope Francis si Cebu Auxiliary Bishop Midyphil Billones bilang bag-o nga arsobispo sang Jaro nga amo ang magabulos kay retired Archbishop Most Reverend Jose Romeo O. Lazo, D.D.
Gin-anunsyo ini sa Vatican 12:00 sang udto kag alas siyete kagab-i naman oras diri sa Pilipinas kadungan sang misa sa Jaro Metropolitan Cathedral nga kadungan man sang selebrasyon sang kapistahan ni Nuestra Señora Dela Candelaria ukon our Lady of Candles.
Si Billones nga naga-edad 55-anyos amo na ang mangin ika-14 nga archbishop sang Jaro nga nagasakop sa syudad kag probinsya sang Iloilo amo man sa probinsya sang Guimaras.
Nabun-ag siya sa Panay, Capiz.
Nagtuon siya sang Philosophy sa St. Vincent Ferrer Seminary sa Iloilo City kag Theology sa Loyola School of Theology sa Quezon City kun sa diin nakuha sini ang master’s degree sa amo man nga program.
Na-ordenahan siya bilang pari sa Archdiocese of Jaro sang Oktubre 2, 1995 ukon halos tatlo ka dekada na ang nagligad.
Lain-lain man nga posisyon ang gintungdan sini sa simbahan lakip na ang pagpungko bilang personal secretary kanday Archbishop Alberto Piamonte kag Archbishop Angel Lagdameo.
Sang 2011, naangkon sini ang Doctorate in Theology halin sa Pontifical Gregorian University sa Roma.
Sang Hulyo 2019, nagaserbe pa sadto si Billones bilang rector sang St. Joseph Regional Seminary of Jaro sang gin-appoint siya sang Santo Papa bilang auxiliary bishop sang Cebu.
Na-ordenahan siya sa episcopate sang Agusto 27, 2019 diri man sa Jaro Cathedral.
Alas otso kaina sang aga, si Bishop Billones man ang nagpanguna sa fiesta mass sa Jaro Metropolitan Cathedral para sa selebrasyon sang pista ni Candelaria nga amo ang patrona sang Western Visayas.
“She is our Lady of Hope…Our Mother, our sweetness, and our Hope. When you lose hope, look up and gaze upon our Mother – the Nuestra Señora de la Candelaria. She carries the Light, Christ, the Light of the World,” kabahin sang homily ni Billones sa atubang sang mga deboto.
Base naman sa report sang Catholic Bishop’s Conference of the Philippines, ginbaton ni Pope Francis ang resignation ni Archbishop Lazo sa edad nga 76 nga lapaw na sa mandatory retirement age sang 75.
Nagserbe si Lazo sa archdiocese sa sulod sang halos pito ka tuig.
