Arestado ang Top 3 Most Wanted Person sa Western Visayas kasunod sang ginpatigayon nga manhunt operation sa Brgy. Purok 4, Pavia, Iloilo.
Ang nadakpan amo si Alyas “Juny”, 44-anyos, kag residente sang Brgy. Ungka I, Pavia, Iloilo.
Sa interview sang Bombo Radyo kay Police Lieutenant Gabriel Manguera, Deputy Chief of Police sang Pavia Municipal Police Station, iya ginpahayag nga naaresto ang suspek paagi sa warrant of arrest sa kaso nga murder ginpaguwa sang Regional Trial Court, Sixth Judicial Region, Iloilo City.
Suno kay Manguera, non-bailable ukon wala sang pyansa ang kaso nga gindagdag sa suspek.
Nahibaluan nga ang suspek ang ginatudlo nagpatay sa 56-anyos nga indibidwal sa Brgy. Ungka II, Pavia, Iloilo, sang Abril 2024.
Preso subong si Alyas Juny sa Pavia Municipal Police Station samtang nakatalana nga ipasa sa korte ang legal nga proseso sang kaso sini.
