Ginkumpirma ni US Secretary of State Marco Rubio nga siya ang ginbutang nga mangin in-charge sa US Agency for International Development (USAID).
Ang kumpirmasyon ni Rubio ang natabo inoras matapos ginbuyagyag sang bilyonaryo nga si Elon Musk nga nagpasugot si President Donald Trump nga i-“shut down” ang amo nga ahensya.
Sa tunga ini sang mga kahangawa kun ano na ang padulungan sang ahensya bangud gin-freeze ang pondo para diri kag ginpa-leave ang mga empleyado.
Pahayag ni Rubio, siya kag ang State Department ang may control subong sa USAID.
Nagsiling ini nga kadam-an sa naga-trabaho sa USAID ang napalpak sa pagsabat sa mga pamangkot sang administrasyon kaangot sa ila nga mga pondo kag prayoridad.
Nahibaluan nga ini nga ahensya ang naga-pagwa sang binilyon nga humanitarian aid kag development funding kada tuig sa masobra 100 ka mga pungsod sa anum ka mga rehiyon.
Gin-establisar ini matapos ginpirmahan ni anay Presidente John F. Kennedy ang US Foreign Assistance Act sang 1961.
Ini nga ahensya ang nagahatag man sang pondo kag assistance sa Pilipinas sa sulod sang 64 ka tuig.
Base sa USAID website, ang total assistance nga nahatag sini sa Pilipinas halin sang 1961 ang naglab-ot sa $5 billion lakip na ang $180 million nga nahatag sang 2024.#
