Ginkalipay sang labor group ang pag-apruba sang Kamara sa P200 across the board wage hike sa private sector.
Ini ang gin-aprubahan sa House Committee on Labor and Employment nga ginapangunahan ni Rep. Fidel Nograles sa diin ini ang substitute bill para sa House Bill 514, 756, 7871 kag 10319 nga lunsay mga hagna agud magpatuman sang saka sa sweldo.
Sa interview sang Bombo Radyo kay Mr. Elmer Forro, Secretary General sang Bagong Alyansang Makabayan (BAYAN) – Panay, iya ginpahayag nga ang tikang nga ini ang makabulig agud makatibawas ang mga mamumugon sa poverty threshold kag makapulos ang bug-os nga pungsod sa pag-uswag sang ekonomiya.
Nagalaom man si Forro nga mangin urgent ang pag-apruba sang hagna sa 19th Congress.
Nahibaluan nga ang mga magagmay nga negosyo kag mga barangay micro-business enterprises ang hatagan sang exemption agud indi mangin palas-anon ang bag-o nga regulasyon sa ila operasyon.
Ginahingyo man sini sa mga employer nga magbulig agud mapabaskog ang purchasing power sang mga mamumugon agud maghatag sang dako pa nga benta kag mag-uswag ang kada negosyo.
Santo sa P200 Daily Across-the-Board Wage Increase Act, tanan nga employers sa pribado nga sektor, agricultural man ukon indi, anuman kadako ang capitalization kag numero sang empleyado ang kinahanglan nga magbayad sang dugang nga P200 sa mga empleyado.
Nasaad sa hagna nga ang sin-o man nga indibidwal, korporasyon, trust, firm, partnership, association ukon entity nga magalapas ang mahimo multahan sang P50,000 tubtob P100,000 ukon pagkapreso sang duha tubtob apat ka tuig.
Ginamanduan man ang employer nga bayaran ang iya empleyado sang doble sang balor sang wala nabayaran nga benepisyo.
Ang Department of Labor and Employment naman ang magapanguna sa paghimo sang implementing rules and regulations sang layi.
