𝗦𝗧𝗔. 𝗕𝗔𝗥𝗕𝗔𝗥𝗔, 𝗜𝗟𝗢𝗜𝗟𝗢 – Nagahilibion nga ginsaysay sang misis nga gina-agawan sang duha ka mister ang rason sang pagluthang-patay sang iya anay live-in partner sa iya subong nga karelasyon sa Sitio Riles, Brgy. Lanag, Sta. Barbara, Iloilo.
Ang ila gina-awayan nga babaye amo si Alyas “May-may”, 42, residente sang nasambit nga lugar, may pito ka mga kabataan.
Ang biktima nga si Rodito Celis Jr., 44, residente sang Brgy. Omambog, Sta. Barbara amo sa subong ang karelasyon ni Alyas “May-may”, apang may asawa man nga yara sa abroad kag may anak.
Samtang ang suspek naman nga si Ronald Susvilla, 45-anyos residente sang Brgy. Dalid, Sta. Barbara ang anay live-in partner ni Alyas “May-may”, may asawa man nga yara sa abroad kag may anak.
Sa interview sang Bombo Radyo kay Alyas “May-may”, iya ginpahayag nga sang 2019, nag-angkon sila sang relasyon sang suspek sa diin may lima ka tuig sila nga anak nga lalaki.
Suno kay Alyas “May-may”, sang nagbusong ini, nag-umpisa na sa pagpakita sang malain nga batasan ang suspek tubtob nagdesisyon ini nga makigbulag na sang Nobyembre sang nagligad nga tuig.
Apang suno kay Alyas “May-may”, indi gusto sang suspek nga mahibaluan sang publiko nga bulagay na sila bangud nahuya ini.
Sang Disyembre, nag-atubangay ang tatlo sa diin ginpili ni Alyas “May-may” nga mag-upod sa biktima kag makigbulag na sa suspek.
Kahapon, nagpadulong ang suspek sa ila balay.
Sang amo nga tion, yara sa katre ang biktima kag yara naman sa kusina si Alyas “May-may”.
Nakibot na lang si Alyas “May-may” sang nakabati sang lupok kag sang gin-usisa, nakita na lang sini ang suspek nga ginluthang ang biktima.
Narekober naman sa crime scene ang pito ka empty shells kag duha ka unfired bullets.
Nagpalagyo naman ang suspek kasunod sang paghimo sini sang krimen.
Insigida naman nga gindala sa ospital ang biktima apang ginbawian man sang kabuhi sa diin walo ang pilas sini kag patal diri ang sa dughan kag liog.
